Биографија






Кратка Биографија


            Д-р Ѓоко Стрезовски е роден на 27.01.1964 година во Ресен.

            Неговиот градоначалнички мандат започна на 11.04.2013 по победата во вториот круг на локалните избори.

            Оженет е со сопругата Соња и има 22-годишен син Антонио.

            Основно и средно образование завршил во Ресен, а дипломирал на Природно-математичкиот факултет при Универзитетот "Св. Кирил и Методиј" во Скопје.  Магистрирал на ПФБ при Универзитетот "Св. Климент Охридски" во Битола, каде што и докторирал, со што се стекнал со титулата доктор на менаџмент на образование. 

            Автор е на повеќе стручни и научни трудови од областа на безбедноста, односите со јавноста, образованието и заштитата на животната средина. Со свои трудови учествувал на повеќе меѓународни научни конференции.

            Носител е на наставно-научно звање доцент и професор на Меѓународниот славјански универзитет „Г.Р. Державин“ во Битола.

            Во професионалната кариера, меѓудругото, бил директор и главен и одговорен уредник на Центарот за печат и радио-Ресен, директор и главен и одговорен уредник на информативниот магазин "Балканска газета", виш советник во кабинетот на Министерот за внатрешни работи, началник на ОВР Ресен, а до кандидирањето за градоначалник беше портпарол на СВР Битола.

            Во периодот од 1996-2000 година бил советник во Советот на Општина Ресен, каде извесен период бил координатор на советничката група на ВМРО-ДПМНЕ.

            Во моментов е постојан коизвестувач на Заедничкиот консултативен комитет на ЕУ од Република Македонија.

            Истовремено, претседател е на Советот за развој на Пелагонискиот плански регион, кон кој гравитираат девет општини од регионот.

            Во минатото,бил познат и како истакнат спортист и спортски работник. Играл фудбал во Ф.К "Преспа" и Ф.К. "Братство" од Ресен, а најголемиот дел во спортската кариера ја поминал како ракометар на Р.К. "ШИП Преспа" и Р.К. "Јафа-промет" од Ресен, каде бил и капитен. Неколку години бил ракометен судија и тренер.